BABAD SOKARAJA

BABAD SOKARAJA

           Kacarita nang kadipaten purbalingga Sang adipati Kertabangsa, nganakna pasewakan sing dirawuhi Ki Patih, para punggawa, prajurut lan ora keri garwa prameswari sing didherekna putrane yakuwe Raden Kaligenteng. Nang pasewakan sing dirembug yakuwe bab Raden Kaligenteng sing arep dijumenengna dadi Adipati ngganteni kalungguhane ramane, nek panjenengane bisa nduweni Keris Brongot Setan Kober.

           Sang Adipati maringi priksa nek keris mau dititipna maring Ki Gedhe Ngorean nang Pratapan Sendhang Balong. Sawise midhanget ngendikane Ramane, Raden Kaligenteng banjur nyuwun pamit arep nemoni Ki Gedhe Ngorean arep nyuwun bali titipane ramane. Kaget Raden Kaligenteng merga Keris Brongot Setan Kober wis ora ana nang astane Ki Gedhe Ngorean, ningen wis dititipna maring adipati Jebuh Kusuma nang Sokaraja. Wusana pasulayan antarane Raden Kaligenteng karo Ki Gedhe Ngorean ora bisa diendhani. Ki Gedhe Ngorean ora kuwat nandhingi kasektene Raden Kaligenteng. Wusana Ki Gedhe Ngorean mlayu maring sokaraja nyuwun pangayoman maring Adipati Jebuh Kusuma.

           Raden Kaligenteng nututi mlayune Ki Gedhe Ngorean nganti tekan kadipaten. Kanthi murang tata Raden Kaligenteng nyuwun Keris Brongot Setan Kober maring Adipati Jebuh Kusuma. Sang Adipati duka yayah sinipi, Raden Kaligenteng ditendhang metu  sekang kadipaten, sang Adipati ngoyok playune Raden Kaligenteng, ningen sedurunge ngoyok, pesen maring garwane sing lagi mbobot nek bayi lair kakung paringana asma Kuncung, dene nek mijil putri mangsa bodhoa.

           Adipati Jebuh Kusuma goli ngoyok playune Raden Kaligenteng didherekna Ki Patih lan para punggawa. Paprangane Adipati Jebuh Kusuma nglawan Raden Kaligenteng kuwe dumadi nang pinggir kali. Raden Kaligenteng nyemplung nang kali lan malik rupa dadi pelus banjur mlebu kedhung, mula kali kuwe siki diarani kali Pelus.

           Sang Adipati Jebuh Kusuma niyat ngenteni metune Raden Kaligenteng sekang kedhung, mula dawuh maring Ki Patih lan pandhereke supaya bali maring kadipaten. Sejerone ngenteni metune Raden Kaligenteng, ujug-ujug ana ambu wangi kembang kenanga nang sekiwe tengene kedhung. Mula kedhung mau banjur ditengeri Kedhung Kenanga. Sang Adipati Jebuh Kusuma terus ngenteni karo semedi.

           Kacarita garwane Adipati Jebuh Kusuma wis nglairna jabang bayi mijil kakung dijenengi Raden Kuncung kaya sing dikersakna Sang Adipati Jebuh Kusuma. Mataun-taun Adipati Jebuh Kusuma ora kondur maring kadipaten nganti Raden Kuncung kepengin ketemu.

           Sewise entuk palilahe Ibune, Raden Kuncung banjur nggoleti ramane  Jebuh Kusuma sing lagi mertapa. Bareng ketemu Ramane, Raden Kuncung banjur diparingi Keris Brongot Setan Kober lan dicritakna bab memungsuhane karo Raden Kaligenteng. Midhanget critane sang Adipati, Raden Kuncung banjur nduweni sedya arep nggoleti Raden Kaligenteng, Raden Kuncung namur laku dadi dhalang kanthi aran Dalang Mertakandha.

           Raden Kaligenteng sing ngilang sekang Kedhung Kenanga siki manggon nang Kademangan Watukumpul. Ki Demang Watukumpul nedya mbukak pasar anyar, sing diramekna nganggo nanggap wayang. Warga watukumpul kepengin nanggap dhalang sing lagi kondhang yakuwe Dhalang Mertakandha. Salah sijining warga ana sing usul supaya Ki Dhalang Mertakandha nggelar lakon Babad Sokaraja. Warga sing usul mau sejatine Raden Kaligenteng.

Dhalang Mertakandha nyendikani panyuwune warga sing sejatine Kali Genteng mau. Nang wiwitan crita, Raden Kaligenteng rumangsa mongkok panggalihe jalaran Ki Dhalang nyritakna kasekten lan kaunggulane Raden Kaligenteng. Ningen bareng Ki Dhalang nyritakna Raden Kaligenteng dianggep ora satria jalaran umpetan nang Kedhung Kenanga lan ngilang nalika perang tandhing mungsuh Adipati Jebuh Kusuma, Raden Kaligenteng banjur duka. Dhalang Mertakandha ditendhang satemah pagelaran bubar awit priyayi loro mau banjur padha perang tandhing. Sejeroning peperangan Ki Dhalang Mertakandha ngetokna Keris Brongot Setan Kober, Raden Kaligenteng kena pusaka kuwe lan malih rupa dadi naga.

Adipati Purbalingga duka penggalihe nalika midhanget putrane salah kedaden dadi naga kenang Pusaka Keris Brongot Setan Kober sing sejatine kagungane Sang Adipati dhewek. Mula Adipati Kertabangsa age-age njujug maring Sokaraja nemoni Adipati Jebuh Kusuma. Sewise priyagung loro padha pinanggih lan rempugan kanthi becik, wusanane padha ndhadha kaluputane lan ngampura-ingampura.

              Adipati Kertabangsa Kondur maring Purbalingga dipethuk putra sing wis malik wujud kaya maune yakuwe Raden Kaligenteng sing bagus rupane. Ora suwe sekang kuwe Adipati Kertabangsa masrahna Kadipaten Purbalingga maring Raden Kaligenteng. Semana uga Adipati Jebuh Kusuma uga masrahna kalungguhane maring Raden Kuncung dadi Adipati nang Sokaraja.

MULA BUKANE AJIBARANG

Kacarita nang Negara Galuh Pakuan lagi nampa pacoban abot. Mangsa ketiga suwe , kawulane rekasa, akeh lelara lan akeh brandhal. Durung ana punggawa sing bisa mrantasi prekara kuwe. Arya Mundhing Wilis sing dadi adipati Galuh Pakuan kudu ngleksanani panyuwunane garwane sing lagi mbobot kepengin dhahar daging kidang sing sikile putih.  Kanthi nitih Turonggo/jaran Dhawuk Ruyung Sang adipati mbeburu kidang minangka tandha rasa tresnane maring garwane.

Gole beburu nganti tekan grumbul Gunung Mruyung sing sejatine kuwe grumbule para brandhal sing biasa gawe rerusuh nang kadipaten. Adipati Mundhing Wilis dikepung para brandhal sing dipandhegani Abulawang. Kepeksa Sang Adipati masrahna barang-barang sing diasta, klebu turangga titihane. Mula Sang Adipati kondur maring kadipaten Galuh Pakuan tanpa kasil.

Tekan kadipaten Sang Adipati rena penggalihe merga putra sing ditunggu-tunggu wis lair kakung. Sengsaya seneng nalika priksa nek jabang bayi mau ana tengere ireng nang lengen kiwane sing minangka toh wisnu tegese bayi kuwe mbesuke bakal dadi priyagung sing berbudi bawa leksana.

Durung suwe gole ngrasakna seneng, malem kapapat sekang bayi lair, ujug-ujug kadipaten dijarah-rayah dening para brandhal sekang Gunung Mruyung. Kabeh barang sing ana nang kadipaten digawa, kalebu putrane Adipati Mundhing Wilis sing esih bayi. Sewise njarah-rayah, para brandhal banjur ngobong kadipaten. Tujune Sang Adipati lan Gusti Putri bisa dislametna dening juru taman. Sebanjure Sang Adipati lan Gusti Putri arep nggoleti putrane kanthi namur laku dadi wong tani aran Ki Sandi.

Brandhal Abulawang rumangsa bungah merga dheweke pancen durung duwe anak. Mula bayi kuwe dirumat kanthi becik kaya dene anake dhewek lan diwenehi jeneng Jaka Mruyung. Suwening suwe Jaka Mruyung wis diwasa, rupane bagus, luhur bebudene, ora kaya bapa angkate.

Jaka Mruyung ora setuju karo tindak tanduke wong tuwa angkate, mula banjur lunga ninggalna umah kanthi numpak kuda Dhawuk Ruyung. Tindake Jaka Mruyung tekan nang wewengkon Dayeuhluhur. Nang kono ketemu  Ki Mranggi. Merga tilas prajurit Majapahit, Ki Mranggi duwe pakaryan dadi tukang gawe wadhah keris. Jaka Mruyung akeh nampa wulangan sekang Ki Mranggi, kayata maca, nulis, carane gawe keris lan ulah keprajuritan. Sewise nem taun  melu Ki Mranggi, Jaka Mruyung kaya nampa wangsit supaya nerusna laku maring ngetan maring wana Pakis Aji. Jaka Mruyung pamit maring Ki Mranggi, lan pesen supaya papan panggonane diparingi jeneng Dhukuh Panulisan.

Tindake Jaka Mruyung wis tekan tapel watesing Kadipaten Kutanegara, nang kana Jaka Mruyung ngaso, kuda Dhawuk Ruyung mangani suket-suket sewarege. Jaka Mruyung ngagungna Asmane Gusti Allah, nyawang kaendahaning alas lan suket sing ijo royo-royo kaya dene babud permadani gumelar. Mula papan kuwe banjur disebut dhukuh Gumelar. Nang kono Jaka Mruyung ketemu karo pemudha sing jenenge Tlangkas sekang dhukuh Cilangkap lan olih pituduh dununge alas Pakis Aji.

Sawetara kuwe, Ki Sandi sing lagi nggoleti putrane wis tekan Dhukuh Panulisan daleme Ki Mranggi. Ki Mranggi nyritakna Jaka Mruyung sing nembe sinau nang umahe, lan ciri-ciirine padha karo putrane Ki Sandi. Ki Sandi mandan lega merga wis ana pengarep-arep nek putrane bakal ketemu.

Ningen Jaka Mruyung sekiye lagi njujug maring Gunung Pakis Aji. Ki Sandi lan garwane age-age pamit ninggalna Dhukuh Panulisan. Tekan Dhukuh Cilangkap ketemu karo wong tuwane Tlangkas sing menehi ketrangan nek Jaka Mruyung wis tekan alas Pakis Aji. Ki Sandi nerusna laku nyabrang kali sing banjur diarani Kali Racak. Nang pinggire gunung priksa ana wit sing wohe akeh, sewise nyuwun priksa maring wong sing lagi liwat, jebul papan kono jenenge Gondhangmanis.

Dicritakna tindake Jaka Mruyung nasak pinggiring wana terus mangetan, ngliwati papan sing akeh manuk jalake, mula pesen maring wong sing pegaweyane tukang nggolet kayu supaya papan kono dijenengi Pejalakan. Jaka Mruyung terus lakune tekan kali Datar. Nang penggokan kali sisih kulon weruh kedhung, sing nang ndhuwure kedhung akeh manuk srewiti sing padha mabur. Mula kedhung mau banjur diarani kedhung srewiti. Sewise ngubengi alas Pakis Aji, Jaka Mruyung mikirna kepriwe carane mbabad alas. Priksa ana wong sing lagi padha gawe Tambak, mula banjur njaluk tulung bareng-bareng mbabad alas. Mbesuke, papan kono banjur diarani Dhusun Tambakan.

Nang tengah alas ana ula gedhe sing banjur dipateni, dibakar, diobong, ningen urube geni sengsaya suwe sengsaya gedhe, pungkasane alas Pakis Aji kobongan. Serehning Alas Pakis Aji esih wewengkon Kadipaten Kutanegara, mula Jaka Mruyung didukani dening Adipati Nglangak lan nampa paukuman. Sewise nampa paukuman Jaka Mruyung tindak-tanduke becik, mula ora suwe diuwali sekang paukuman lan olih kalodhangan melu ngleboni sayembara perang. Jaka Mruyung kasil ngalahna mungsuh-mungsuhe, mula diwisuda dadi senapati utama kadipaten Kutanegara.lan didhaupna karo putrine sang Adipati sing asma  Dewi Pandhan Ayu.

Kabar dhaupe Jaka Mruyung karo Dewi Pandhan Ayu semebar nang ndesa-desa nganti kepireng Tlangkas lan wong tuwane. Ki Sandi uga mangerteni kabar kuwe, banjur mbukak wadine nek sejatine dheweke kuwe Adipati Mundhing Wilis sekang Galuh Pakuan. Tlangkas lan wong tuwane kaget bareng ngerteni sapa sejatine Ki Sandi lan Jaka Mruyung. Mula age-age maring kadipaten nemoni senapati utama Jaka Mruyung prelune arep nyritakna sapa sejatine wong tuwane. Jaka Mruyung kaget lan nangis sewise krungu critane Tlangkas, nganti nggetuni lelakon uripe.

Sang Adipadi Nglangak gumbira penggalihe bareng midhanget ature Tlangkas yen mantune kuwe sewijining Pangeran, putra Adipati Galuh Pakuan. Mula Adipati Mundhing Wilis lan garwane banjur dipethuk supaya mlebu Kadipaten Kuthanegara nekseni dhauping penganten. Ngepasi rame-rame pahargyan penganten, ujug-ujug ana kabar sing gawe gegere pahargyan, yakuwe ilange Dewi Pandhansari putra mbarepe Adipati Nglangak, ya mbekayune Dewi Pandhan Ayu. Mbokmenawa Dewi Pandhansari lingsem penggalihe dilangkahi dening Dewi Pandhan Ayu, adhine. Seweise digoleti jebul lagi tapa nang kali, mula ora gumun akeh wong lanang ya kaum laki sing padha teka kepengin ndeleng Dewi Pandhansari. Mula kali kuwe banjur diarani Kali Luwih Laki utawa siki diarani kali Wilaki. Wusana dikabarna nek Dewi Pandhansari seda nang kali kuwe lan disarekna nang tengah sawah. Pesareane kondhang kanthi aran Pesaren Pandhansari.

Adipati Nglangak yuswane sengsaya sepuh, mula banjur masrahna kalungguhane maring Jaka Mruyung kon madeg dadi Adipati Kutanegara. Ningen sewise dadi adipati, Jaka Mruyung ora krasan  nang Kutanegara. Panjenengane pindhah maring alas Pakis Aji sing wis dibabadi didadekna punjering peprentahan kadipaten, nuli disebut Ajibarang.